BRUNO

       

    Nunna nei lo thil leh bungrua mai mah hi kan kawl tlangnel leh kawl rei tawh a niha mahni ta anih ngat phei chuan a lo ngaihawmin a lo hlu thei hle thin. Chu mai nilova nunna nei, min ngainaa kan chunga rinna nghat ngam ngat. Chhiatna emaw thil tha lo kan tawh palh pawha min khawngaiha kan chunga lainatna lantir thei phei chuan kan nunah hian hmun a awh thuk thei viau mai.

    Heta a thlalak ka dah hi kan ui ngainat em em leh chhungkuaa kan buaipui ve tak mai a ni a, ka fapa naupang ber phei hi chuan a ngai ngawih ngawih thei hial! A hming atan Bruno tih a phuahsak a, an infiam nasa thin hle mai. A harhin a hlei ve hle thin a, pawi erawh a sawi lo viau thung.

    Kan ui hming BRUNO tih hi eng tawng nge a nih chiaha engtihna nge anih reng kan hre lova, kan ui hming leh a kohna a ni tih hi kan hrilhfiah theih dan thui ber chu a ni mai. Amah Bruno pawh hi kan koh apianga min pan chat theih danah hian a hming a ni tih a hria tih a hriat theih a, a hming awmzia kan hriat dan a inchen chiah anih chu!! Kan va inhrawn tawk tak em!!

    Chhungkua na na na chuan inanna lai te pawh kan lo nei ve a, chu chu sa kan duh em emna hi a ni ta berin ka hria. Heti taka hahdam si hi kan duat ber angreng lawi a, a damchhung ni zawng khan hnathawkah kan phut miah lo. Hei tak hi kan fakawm ve em emna lai te pawh niin a lang. Han phuta han hruai viau tur pawhin a enkawltute pawh hi kan tha a za zek zawk lo te pawh a ni tel ve bawk ang chu!!!

    Bruno hi a la naupan viau laiin a til ka laktir pek a, hemi ni atang hian kan chhungkuaah transgender kan lo awm ve ta chu a ni a, ka thil tih fuh loh tak ni te pawhin ka hre leh hnuhnawh a, ka inthiam lo ru viau mai.

    Engle-khawle, chutia til nei ta lo na na na chuan chi thlah thei hek lo, tu leh fa nei lovin a damchhung nite chu a chhiar liam ta ngawt kha a ni a. Mahse keini mihringte angin a phunin a nawi a nawi ve lem lo. Tin, han phun chiam tur pawhin a tawng thei tlat lo.

    Bruno hian mizo tawng a thiam a nih ka ring a, a chhan chu kan thusawi kha a hre thiam tlat. Vai thusawi chu a hrethiam miah lo! Mahse zir lo tafam chuan ziak leh chhiar kha a thiam lo ni turah ka dah ngawt a. Ziak hi chu a thiam lo chiang tih ka hria a, chhiar tak kha a lo thiam ru reng thei. Lehkha bu te kha a melh ve reng thin tak e! Mahse vawikhat mah a chhiar ri lo.

    Kan duatin kan dah awl viau naa a thlarau nun lam kha kan lo ngaihthah a ni chek ang chu a dam chhung ni zawng khan vawi te khatmah biak in lamah kan hruai lo. Vawikhat chu a ma thu ngatin biak inah a rawn kal thung a, mahse a thlarau nun tuihalna lam aimahin a tisa riltamna lam niin a lang thung; kohhran ruaitheh lai a ni tlat.

    Mihringte hian kan damchhung hun rei lohzia kan sawi chamchi mai a, Bruno kha a naupan atanga a upat thleng, a damchhung kum kha kum hnih vel niin ka hria. Phun nawi chu sawi loh hlim tak leh enghelh nei eih lovin kha a damchhung kum reilote kha a chhungkaw neih ve chhunte min tihhlim loh leh min tih lungawi loh hlau reng rengin a hmang tluan a, kan hauh pawhin mei vai lap lapin lawmthu min hrilh thin nia! Camping leh inkhawm ngaihsak si lo kha a nun a ngil riauva, pawl leh kohhran lam ngaihthah deuh e tilo chuan a tlawmngai phian bawk. Sum leh sannate, lei mawina te aimah chuan sa rim a ngaina. Vanram kai tak maw!