Chaw a lo nêm lutuk palh hlauh chuan pakhat chaw nèm vangin a phunnawi deuh a, pakhatin 'chuti khawpa chaw rum i duh chuan a fâiin bâr la ti nia!' a ti a. Pakhat ve thungin 'chutia i duh nêm viau chuan tuisik hâwp la ti nia!' a lo ti ve leh khauh thung țhin.
Engle-khawle, a ngaina lo tana khaini rim chhiatna tak hi a duhmi tana a tuina zu ni mauh pek a!
 |
| BRUNO |
 |
| Ka pi leh a tute 💖💖💖 |
Hei thlalaka lang, a lai taka thu hi a lian ber tih kan hmu. Ka pi a nih hi; ka pu nupui chu.
Ka pi chanchin ka hriat theih chin chu a fate atangin a ni mai a. Chumi hmalam chu ka hre pha lo nasa lutuka sawi tur ka nei lo. Ka pi hian a pi veleh chhawng Evi kha anna tak a nei. Apple lam chi reng reng hi a ngaina hle (Eden huan laia ei thianglo theirah kha Apple ang deuh turah han dah ngawt ila!). Evi kha chu theirah ei turin thlem a ngai a. Ka pi ve erawh thlem kual buai vel a ngai lo. A duh tawp! 😄
Ka pi hi ka pa nu a ni. Ka pa te unau hi unauza rual mahnise pasarih an ni. Chu chu Pathian nambar kan tih hi a ni. Chumi thlah kal zel pawh nilo an thlah chiah chiah ka ni. 😇 Engpawhnise ka pi chanchinah lut tawh teh ang:
Ka pi hi mihlim thei tak a ni a, inti mihlim, rau rei ruai ang chi erawh a ni lo. Fiamthu duh tak, thiante zingah pawh an hlimpui ve thin tak mai a ni. A nulat lai nen inkawm hman ila kan nawi dun thin ngawt ang!
Ka pi sawi chuan thingpuisen hang, chini leh bawnghnute pawlh ngat ni si hi sawi tel loh theih a ni thin lo. Chawei kham thingpui hi khel lovin a in thin, a in lam a peih tluk zetin a lum peih bawk. Tin, chanchinbu chhiar a peih hle. Hei vang te pawh ni a ni mahna a polite-in manner a hre vei phian. Chuti taka manner hria e tilo chuan TV a en ring thei hle. Ring tak leh hnai taka TV en duh mi a nih avang hian thil chik tak a ni tihna a ni kher lo. A ni thei tho bawk. Football khel en a peih em em tluk zetin TV serial film a ngaina bawk.
Ka pi hian chakai a ngaina thin hle a. A tar deuh tak hnu, ha a neih that tawh loh tak hnu pawh hian chaicheh inchhawp rapa chakai hmeh duh mai, tute tlangvallai emaw ang maia a bawppui lian lian thlang nalh nalh thin a ni. Chuti taka chakai duh e tilo chuan a sakhuana avangin a ei zui ta lo thung. Mak tak a ni!
Ka pi hian zawngtah leh thingthupui a ngaina takzet a, a ha that tawh loh avanga a thial theih tawh loh hnu pawhin zawngtah hi chu a chhum hmin hnipa a ei tho. Nia, a uih ting mai!😂
Ka pi hian ui a vulh tawh, sadama tiin a ko. Chu ui chu ui lian tak a ni a, alsatian an tih ang hi a ni. Tuktin thakhurni tuikhur lamah an inpawt dawr dawra hmai an phih thin. Sadama lah khan a peih lo thin ve khawp mai. Pitar hmai phihsak ngai nih te pawh kha a zak a ni ve mahna! Sadama chuan chaw a heh em em ringawt mai. Chhawr bawkna em em an neih ka hre lo. Thleng lian ve tak mai hian vum thur khawpin chaw an chhawp a, tuisik chawm a ni emaw, satui chawm a ni emaw a ei zo hneh em em zel. Chu mai a la nilo, thenawm hnaivaite vawk chaw a lo ei belh teuh thei tho thin nia! Chuti taka theih tawp chhuaha duat tak maia an enkawl fe hnu chuan a bo! Chu chu sadama dam hun chhung chu a ni.
Ka pi hian fapa panga a nei a, a then an sam a kir a, a then an sam a mam. Sam kir hi lukir tih an ni. Ka pi fate zinga a lukir ber hi milar ni silo chanchin ngah ve nek ang hi a ni. A ni chanchin hi hun ka nei a nih chuan han zir bing te pawh ka duh hial nia! Zir bing han tih le'mah chutia a ni chanchinah hian han zirbelh tur erawh a awm a ni lem hlei law!
Ka pi hi Seni tia koh a ni. Kum 100 min dam thlenpui hlauh a nih pawhin Seni a ni tluan thovang. Baby-i kum upa ve tak tak pawh an awm nawk tho a lawm. Lalnunmawii pir var ve zet pawh ka hria!
Ka pi hian a tu leh fate zingah a kawm rualpui a nei miah lo mai hi ka khawngaih thin. Keini lam pawh kan demawm bik love; pi te nena inrual thu awm bik hek lo le!
Ka pi hian a pasal a sun tawh a, a kawm rualpui thiante an tam ta bik lo. A awm chhunte nen pawh inlen pawh turin an tha leh zung, an khaw hmuh te'n a zo tawh miau silova an khua a har hian ka ring ve thin.
Ka pi fate hian nupui/pasal an nei tawh mai nilovin tu leh fate neiin an tu leh fate pawhin nupui/pasal an nei duah tawh hlawm hial a. Chu'ng chhungkaw hrang indin thliah te chuan kan neih intawm leh min neitu ni bawk chu ka pi hi a ni. Thil dang zawng chu a neitu bik kan awm theuh a, ka pi erawh chu kan ta bik a ni theuh a, kan intawm theuh bawk.
Ka pi awm mai mai hian tha chak tak nei, hlawh tam tak nei leh hausa takin a duh thua a tih theih miah loh hna ropui tak mai chhungkaw phuarkhawm hna a thawk reng hi a ni a. A tu leh fate zingah hian ka pi awm mai maiin a tih ang thawka ti thei pakhatmah kan awm lo. Ka pi hian a dam chhung hun hman ral ni neiin a hna ropui hi chawlhsan hun a la nei ve ngei dawn si a, chutih hunah chuan a tu chhuan kal zelte hi mihrang kan lo ni chho bek bek tawh ang. Chu chu hringnun a ni miau si a le!
Ka pi hi dam hlen thei se ka va ti tak!
